Rutsiro: Umugabo w'imyaka 53 yasanzwe mu mugozi yapfuye nyuma y’amakimbirane yo mu muryango we
By: ISIYOSE TV |
Inkuru ibabaje yaturutse mu Karere ka Rutsiro aho umugabo w’imyaka 53 yitabye Imana nyuma y’igihe arimo amakimbirane n’umugore we. Byabereye mu Murenge wa Manihira, Akagari ka Muyira, Umudugudu wa Rutangaza, ku mugoroba wo ku wa 27 Ukwakira 2025.
Abaturanyi bavuga ko uyu mugabo yari amaze iminsi afite ibibazo by’umubano n’umufasha we w’imyaka 52, byashingiye ku makimbirane y’urugo. Bivugwa ko urupfu rwe rwamenyekanye ubwo umukobwa we w’imfura yamusangaga mu ruganiriro atakiri muzima.
Ubuyobozi bwasabye abaturage kwegera inzego zibishinzwe
Umuyobozi w’Akarere ka Rutsiro, Kayitesi Dative, yahamije aya makuru mu kiganiro yagiranye n’itangazamakuru, agaragaza ko byababaje kubona umuntu afata umwanzuro wo kwiyambura ubuzima.
“Ni byo koko ayo makuru twayamenye. Byaturwaye umutima kuko amakimbirane mu muryango ashobora gukemurwa binyuze mu buyobozi, mu biganiro no mu bwumvikane. Kwiyahura si igisubizo ku kibazo cyose,” — Kayitesi Dative.
Yongeye gusaba abaturage bose bafite ibibazo byo mu ngo kwegera inzego z’ibanze, abajyanama b’ubuzima cyangwa abashinzwe imibereho myiza y’abaturage kugira ngo bafashwe kugera ku mahoro n’ubwiyunge.
Umurambo wajyanywe gukorerwa isuzuma
Inzego z’umutekano zamenye iby’uru rupfu zihita zitabara, umurambo w’uyu mugabo ujyanwa ku bitaro bya Murunda kugira ngo ukorerwe isuzuma ry’ibanze mbere yo gushyingurwa mu cyubahiro.
Abaturage basabwe gukomeza kugira uruhare mu gukumira amakimbirane mu miryango, bagashishikarizwa gusaba ubufasha mu gihe hari ibibazo bibarenze.
No comments:
Post a Comment