Amissi Cedric yiseguye nyuma yo guhagarikwa no kwamburwa ubukapiteni muri Kiyovu Sports
Nyuma yo gufatirwa ibihano byo kudakinira Kiyovu Sports imikino ibiri no kwamburwa inshingano zo kuyobora ikipe, Amissi Cedric yasabye imbabazi avuga ko ibyo yakoze byaturutse ku burakari bw’ako kanya, atari ubushake bwo kubahuka ikipe.
Kuri uyu wa Gatatu nibwo ubuyobozi bwa Kiyovu Sports bwatangaje ko bwamuhagaritse kubera imyitwarire yo gukubita hasi igitambaro cy’ubukapiteni ubwo yasimburwaga mu mikino yayo iheruka yakinaga na Gasogi United ndetse na Al Merreikh.
Amissi Cedric: “nabitewe n'umujinya, ntabwo nashakaga kubahuka ikipe”
Uyu myugariro yavuze ko asobanukiwe ingaruka z’ibyo yakoze, kandi ko asaba imbabazi bose bagize uruhare mu buzima bwe bwa ruhago muri Kiyovu Sports—abafana, abatoza n’ubuyobozi.
Yagize ati: “Ndashaka kubivuga mbikuye ku mutima. Imikino ibiri ishize ntabwo yatubereye myiza, nzi ibyo munsaba nk’umukinnyi ndetse n’uko iyi kipe impa icyizere. Nemera amakosa yose nakoze, by’umwihariko gukubita hasi igitambaro cya kapiteni igihe nasimburwaga.”
Yakomeje agira ati: “Byari ibihe by’umujinya nta kindi. Ntabwo nigeze ngambiriya kubabaza abafana, abakinnyi bagenzi banjye cyangwa ubuyobozi. Icyo gikorwa cyatanze ishusho mbi, ndabyumva kandi mbisabiye imbabazi.”
Yasoje ati: “Kiyovu Sports ni ibintu byinshi kuri njye. Uburyo mungaragariza ubufasha buranshimisha. Nsaba imbabazi uwo ari we wese natengushye, kandi mbizeza ko nigiye kuri ibi byose ndetse nzagaruka meze neza kurushaho.”
Imikino azasiba
Amissi Cedric ntazakina umukino wa Gorilla FC uteganyijwe kuri uyu wa Gatanu, ndetse n’uwa Etincelles FC uzabera i Rubavu tariki ya 7 Ukuboza 2025.
Injira kuri WhatsApp Channel yacu y’amakuru ya siporo: KANDA HANO WINJIRE
Share this article
No comments:
Post a Comment