Dosiye ya Yampano: Djihad na Pappy Nesta Batawe muri yombi, Abekekwa Bamaze Kuba Batanu

Djihad yatawe muri yombi akekwaho gukwirakwiza amashusho ya yampano

Cyprien Uzabakiriho uzwi nka Djihad hamwe na Kwizera Nestor wiyita Pappy Nesta bafashwe n’inzego z’umutekano bakekwaho gukwirakwiza amashusho yagaragazaga Yampano mu bikorwa by’ubusambanyi, bituma umubare w’abafunzwe muri iyi dosiye ugera kuri batanu.

Umuvugizi w’Urwego rw’Igihugu rw’Ubugenzacyaha (RIB), Dr. Murangira B. Thierry, yemeje ko kuri 26 Ugushyingo 2025 ari bwo bafatiwe mu mujyi wa Kigali kubera uruhare bakekwaho mu gukwirakwiza ayo mashusho atari akwiriye gusakazwa ku mbuga nkoranyambaga.

Yagize ati: “Turi kugenzura iby’iki kibazo kandi tuzakomeza gukora iperereza kugeza uwo ari we wese wagize uruhare agaragaye. Ibi bikorwa bigomba gushira burundu, kandi amategeko azakurikizwa uko bikwiye.”

Aba bombi bafungiye kuri Sitasiyo ya RIB ya Kicukiro mu gihe iperereza rikomeje kugira ngo dosiye yabo itegurwe ishyikirizwe Ubushinjacyaha.

Icyi kibazo cyatangiye gukurikiranwa nyuma y’ikirego Yampano yatangiye ku wa 9 Ugushyingo 2025. Nyuma y’icyo kirego, hafashwe abandi uko baketsweho kugira uruhare mu gukwirakwiza amashusho:

• 11 Ugushyingo 2025: Hafashwe Ishimwe Patrick uzwi nka Pazzo Man.

• 14 Ugushyingo 2025: Hakurikiraho Kalisa John uzwi nka K. John.

• 17 Ugushyingo 2025: Dosiye ya Pazzo Man na K. John yashyikirijwe Ubushinjacyaha.

• 18 Ugushyingo 2025: Hafashwe Ishimwe François Xavier ukekwaho kwaka abantu amafaranga ngo abasangize ayo mashusho.

Kugeza ubu, abantu batanu bamaze gutabwa muri yombi muri dosiye ijyanye no gusakaza ayo mashusho y’urukozasoni, mu gihe iperereza rikomeje kugira ngo hamenyekane n’abandi babigizemo uruhare.